كأنه اسم فيلم مرعب صح
اسوأ شي في الحياة واجبات الاجازة
بس لازم منها
ممكن تقولو كدة شرٌ لابد منه
كل طالبات الجامعة عندهم واجبات في الاجازة
وده شي اتعودنا عليه خلاص
اولاً: كل سنة وانتو طيبين عيد اضحى مبارك عليكم جميعا
ثانياً: مبروك علينا تمديد الاجازة ❤️
لأنه صراحة جا في صالحنا لأني بيني وبينكم كدة
اليوم احد ولسة ما فتحت ولا واجب
فقلت خليني اشارككم الموضوع ده
المهم
الاجازة حلوة بس مصيرها تخلص
وصعب جداً نخلي كل الواجبات لآخر يوم
عشان كدة قلت لازم نبدأ شوية بدري يعني ٣ ايام قبل انتهاء الاجازة مثلا
لازم تقسمي واجباتك
الأهم فالمهم
١ واجب برمجة مثلا (الطويل واللي فيه اكثر الشغل)
٢ واجب اساليب كتابة
٣ واجب الحوسبة او الاحصاء يعني اللي تشوفيه سهل عندك
بس طبعا التقسيم ده يختلف من شخص لشخص
بالنسبة ليا انا اشوف الاحصاء اهم وياخد وقت اكثر
من الاساليب وفي غيري يشوف العكس
ده غير اختلاف المواد طبعاً
ابدأي في رقم ١ واذا لقيتي نفسك تعبتي في النص
خدي بريك وارجعي كمليه
ولو لقيتي نفسك لسة معلّقة ومو قادرة تكملي ابدأي في رقم ٣ خلصيه او اشتغلي فيه وارجعي ل ١ ان شاء الله حتلاقي نفسك مشيتي وكملتي
طبعابعدها ابدأي في ٢
وكملي في ٣ بنفس الطريقة اللي قلتها
Note:
واذا كنتي اشطر مني وخلصتي قبل الدراسة بيوم استغلي اليوم ده في مراجعة اللي درستيه قبل الاجازة تنشيط للذاكرة عشان لما تبدأي دوام
ما تكوني ملخبطة و تحاولي تفتكري اللي فات
في المحاضرة الجديدة وتروح المحاضرة عليكي
بسبب انك مو مجمعة وده اللي كان يحصل معايا كتير الصراحة
حاولت اختصر لكم في البوست ده
حنحاول ان شاء الله كل فترة معينة ننزل بوست
وحنبلغكم اذا حيكون كل اسبوع او كل اسبوعين حسب التخطيط
لا تنسو تكتبولنا كومنت حيبسطنا جداً
اقتراحاتكم للبوست الجاي
اسئلة مختصة بالبوست ده اي شي تبغوه
حنكون ان شاء الله جاهزين للرد
كمان عندنا اكاونت في تويتر
لو ما تبغو تكتبو شي علني في الكومنتس
 |
| IS_Bloggers@ |
ممكن ترسلولنا عالخاص وحنرد عليكم بإذن الله ❤️
