المستوى الخامس

في ده المستوى قريب جدا من المستوى الرابع بس اسهل صراحة رح تكوني ملزومة بأربع مواد تخصص  ومادة  عامة او حرة غالبا ثقافة 3

1.      مبادئ التسويق (principles of marketing)

دي المادة بإختصار مادة ادارة قريبة شوية من مادة Management  اللي في المستوى الرابع بس اسهل واوضح وكلامها قريب من الواقع اختباراتها غالبا تكون اختياري وكم سؤال مقالي  مادة حلوة وممتعة و تاخدي فيها درجة حلوة صراحة

عدد الساعات: ساعتين

معمل: لا يوجد

واجبات: واجبين او ثلاثة

مشروع: برزنتيشن بسيط تسوقي فيها لماركة او شركة او منتج من اختيار فريقك المكون من شخصين او ثلاثة

طول المنهج: وسط

2.      تراكيب بيانات (data structure)

دي مادة برمجة اسهل بكثير من برمجة 2 وقريبة جدا من برمجة 1 عبارة عن حل مشكلات او يعني تتعلمي تعمل هيكلة معينة لعملية حسابية عندك بالجافا جدا حلوة وممتعة لو تحبي الرياضيات وحل المشكلات وكدة دي المادة حتعجبك مرة وحتى الاكواد الللي فيها سهلة جدا ممكن جدا تجيبي فيها درجة حلوة

عدد الساعات: 3 ساعات

معمل:لها معمل مهم جدا يعتمد عالبرمجة بلغة الجافا

واجبات:لها واجب او اثنين خارج المعمل وله واجبات اكثر من المعمل

مشروع: لها مشروع مهم لكن بسيط جدا

طول المنهج:وسط مو طويل وممل ولا قصير ومختصر لكن ممكن تخلص المنهج قبل انتهاء الدراسة باسبوعين

3.      تراكيب متقطعة(discrete structure)

مادة رياضيات بحتة تعتمد على القوانين وحفظها وتطبيقها واغلبها عمليات حسابية

  عدد الساعات:3

معمل:لا يوجد

واجبات:كثيرة الواجبات

مشروع:لا يوجد

طول المنهج:طويل

4.      تنظيم وبنيان الحاسب(computer architecture and organization )

دي المادة اللي اقدر اقول انها طلعت عيني كنت صراحة اذاكرها ولا اعرف ايش علاقة  الكلام ببعض انا ما ابغى اخوف احد بس المادة ثقيلة دم ومتعبة تتكلم عن شكل الكمبيوتر من الداخل كتركيب (ده الجزء المفهوم من المادة) وتتكلم عن كيف الداتا بتتحرك داخل الجهاز وكان ده يعتمد عالخيال لأنه شيء غير ملموس (ما يحتاج اقول انه ده الجزء الغير مفهوم من المادة)  

عدد الساعات:3

معمل:لها معمل سهل احرصي انك تاخدي فيه درجات حيكون ببرنامج اسمه المات لاب

واجبات:لها واجبات في المعمل والمحاضرة

مشروع:بحث عن موضوع من موضوعات المادة

طول المنهج:طويل