FCIT Projects

السلام عليكم ،
بما انها فترة مشاريع تقريبا دحين كل الاستاذات اعطوكم خبر ايش هوا المشروع للمادة وقد اتكلمت عن المشاريع بشكل  مختصر في موضوع  

Information System

زي ماقلت المشاريع عندنا في الفيصلية لكل مادة وغالبا تكون قروبات مو بشكل فردي ف حكتبلكم نصائح تفيدكم في دا الموضوع  

~ اول شيء لا تروحي مع قروب ماتقدري تتعاملي معاهم او منتي قريبه منهم حاولي قد ماتقدري تكوني مع صحباتك لانو العمل جماعي وماحتقدرو تسوو كل شيء في الجامعه ف اكيد حيكون بينكم تواصل دائما وممكن تتجمعو برا الجامعه 

~ لا تعتمدي على البنات في كل شيء وتنسي نفسك لازم تحطي في بالك انو هذا مشروعك انتي .. انتي جزء من هذا المشروع ف لازم تشتغلي عليه معاهم وتكوني فاهمه كل نقطه اتعملت فيه  

~ حاولو تشتغلو مع بعض دائما اقل شيء الاشياء الاساسيه وبعد كدا ممكن تقسمو الشغل بينكم و لما تقسموه لا تكوني مهتمة في جزئك انتي بس لا شيكي على الباقي وخلي غيرك يشوف جزئك لأن احيانا يكون في اشياء ما تشوفيها انتي وغيرك يشوفها والعكس  

~ اختياركم لموضوع المشروع مره مهم اول شيء لازم تكونو مقتنعين فيه كلكم ويكون موضوع مناسب وحاولو انكم تختارو موضوع صغير مو مره واسع 
  حقولكم مثال لدي النقطه كان عندنا مشروع لمادة ادارة المشاريع البرمجية ف اخترنا نعمل 

condominium  

 ماأقولكم قد ايش تعبنا واتورطنا في الموضوع لانو مره واسع نحتاج ندير مشروع لعدة مباني مو مبنى واحد يعني لو اخترنا فندق بس راح يكون مره اسهل  

~ لو كان المشروع فردي وغالبا تكون في مشاريع البرمجة .. قسمي وقتك لا تقعدي تشيلي هم انو الشغل كلو عليكي مره عادي وبالعكس له فوائد احيانا كل ماتكوني فاضيه تقدري تشتغلي عليه وتتحكمي فيه زي ماتبغي 
اذا فيه جزئية ماعرفتيلها ابحثي ودوري عنها او ممكن تسألي صحباتك او مرجعك للاستاذة ماحتقول شيء وحتفيدك 
انا عن نفسي في البرمجة كنت كل خطوة اعملها او اي خطأ طالعلي وماعرفت احصلو اروح للاستاذه على طول واستفدت منها كثير

~ من ناحية التسليم غالبا تكونو عارفين متى التسليم من اول ماتعطيكم الاستاذة المشروع او بعدها باسبوع ف لا تطنشو المشروع لانكم شايفين تاريخ التسليم بعيد والله حتتعبو لانو عندكم فوق الاربعة او الخمسة مشاريع في الترم وعندكم ميدات واسايمنت ف لازم تشتغلو فيه شويه شويه

اخر شيء انا اشوف انو المشروع شيء مره حلو اول شيء لانو تطبيق عملي يعني حتفهمي المادة اكثر وحتستفيدي اكثر وبعد ماتخلصيه تحسي بإنجاز كبير عملتيه 

الله يوفقنا كلنا في مشاريعنا ✨