ايش احتاج في البداية؟

اول يوم في الجامعة

او

اول يوم في الكلية بالأصح 

الكلية والتخصص غييييييييييييير عن التحضيري 

كل شخص له تعريف او احساس خاص لأول يوم 

يختلف عن الثاني 

في ناس تشوف انه يوم exciting وحماس ونشاط وكدة 

غالبا يكون للناس اللي دخلو الكلية اللي كانو يحلمو بيها مو يبغوا بس 

في ناس عادي ما تفرق زيه زي اي يوم دوام  

وناس تشوف انه يوم نكد ويوم ثقيل وممل وده للناس اللي دخلو كليه ما يبغوها غالبا 

او 

(حنلاقي كثير منهم عندنا وانا"غيداء"كنت منهم) دخلو كليه يبغوها لكن فرع ما يبغوه مثلا

كانت تبغى السيلمانية ولقت نفسها في الفيصلية 

عادي جداً هيه كم يوم وتسيري طبيعية وتشوفيه دوام عادي 

لكن اذا عدّت فترة وانتي مو مقتنعة بالتخصص ومو قادرة تمشي فيه ومتضايقة ومتنكدة

اعرفي انك في المكان الخطأ وما ينفع تصبري اكثر من ترم

 ولازم تجلسي جلسة صراحة مع نفسك وتعرفي ايش تبغي 

اما اذا خلاص اتعودتي وكده ولقيتي نفسك حابة التخصص 

خلينا نقولك ايش تحتاجي في كلية الحاسبات من اشياء مادية  

اول يوم تحتاجي 

١: دفتر وقلم 

وتكوني كاتبة الجدول وارقام الكلاسات ومواعيدها 

وتكتبي فيه ايميل الدكتورة وساعاتها المكتبية وحيكون في سلايدات تطبعيها ولا كتاب وكدة 

اشياء مهمة 

بالنسبة لباقي الترم 

انا شخصيا احب يكون معايا دفتر محاضرات اكتب فيه الاشياء المهمة مع الدكتورة وقت الشرح

وممكن تكتبي في الكتاب او السلايدات ده شي راجعلك 

٢: اهم اهم اهم اهم شي وهو الكمبيوتر، الحاسب، اللاب توب...... اللي تبغي تسميه 

بما انها كلية الحاسبات فاعرفي انو نص درجاتك في ده الجهاز ولازم يكون لكي جهاز خاص فيكي 

عشان شغلك ما يضيع اولا وعشان ما يسير الجهاز بطيء ويستفزك 

وغالبا مارح تحتاجي تجيبي جهازك كل يوم فلا تشيلي هم انك حتجيبيه كل يوم 

لو لسة حتشتري جهاز النصيحة الوحيدة اللي ممكن اقدم لك هيه بدون تردد 

يفضل انو جهازك  يكون مو اقل من
core i5
 والافضل
 core i7
 وهو المستخدم في اجهزة المعمل في الجامعة

بالنسبة للخزاين (اللوكرز) حقت الجامعة لو تبغي تأجري وحدة كل اللي عليكي تعمليه انك تروحي مبنى الشؤون اللي بعد الاداب اخر شي وتحجزي لوكر وتاخدي رقم الحساب وتسددي ٤٠ للسنة او ٢٠ للترم وفي طريقتين للتسديد 

اما ١: تروحي سامبا وتعملي ايداع بالطريقة القديمة وتجيبي الوصل وصورة منه 

او ٢: وهي الطريقة الاسهل لو عندك او احد تعرفيه عنده حساب (خاص) في سامبا 

يروح لمكينة صرافة ويعمل تحويل ويجيب الإيصال حق التحويل وصورة منه كمان  

تقريباً دي هيه الاشياء الاساسية في اول ترم 

Notes

1 -  لا تتردي تكوني صداقات مع البنات اللي في كلاسك لانو كلهم ضايعين زيك تقريبا

2 -  لا تخافي تسألي البنات اللي اكبر منك في اي شي محتاجتو او محتاره فيه او حتى واجبات محتاجه مساعدة فيها

3-   google   و YouTube   حكيونو اصحابكم في الجامعه والواجبات وفهم بعض الجزيئيات الغير مفهومه

4 -  لا تحكمي ع الاستاذات من اول كلاس وابدا ابدا ابددددا ما تسمعي ارآء البنات في الاستاذات لانها مختلفه من وحده لوحده  .. كتير ظلمنا استاذات لاننا سمعنا عنهم اشياء مو حلوه و بالآخر طلعو مره كويسين