Information Systems (IS)

بما أنو هذا تخصصنا حابين نتكلم عنه بالتفصيل ايش هوا نظم المعلومات ايش المواد في المستويات الاولى .. الى المستوى السادس تقريبا ، مشاريعه ، المسمى الوظيفي له و مجالات العمل فيه 

ماهو تخصص نظم المعلومات ؟! ( وقد عرفناه قبل ) 

هذا التخصص يجمع بين الحاسب والادارة ، يعتمد على دراسة النظام المطلوب تنفيذه وتحليله وعمل قواعد البيانات له 

بمعنى انه يقوم بحل المشاكل الموجودة وحلها باستخدام التقنية 

هوا تخصص داخل ضمن احد اقسام علوم الحاسب لكن له علاقة بسيطة بإدارة الأعمال فهو الجزء المكمل لعلوم الحاسب لادخال التقنية في عالم الأعمال . 

~التخصص جميل جدا حتنبسطي فيه اذا لكي اهتمام للادارة 

~مناسب للبنات جدا بالذات في مجالات العمل 

~ يجمع بين الفهم والحفظ ، كانو يقولولنا اغلبه نظري بس مع التجربة لقينا انو حتى الحفظ فيه لازم ينفهم 

~ كانو يقولو انو اسهل تخصص في الحاسب بس انا مره ضد دا الموضوع كل تخصصات الحاسب صعبه ويحتاجلها تركيز وكل وحده تحتاج ميول معينه 

المواد : 

طبعا حتكلم عن المواد من اول ترم تتخصصي نظم معلومات يعني مو اول ترم في كلية الحاسبات 

 وبس مواد نظم المعلومات لانه حتاخذي معاها مواد متطلبه ومواد عامة ومايحتاج نتكلم فيها 

من المستوى الرابع حتدخلي في مواد ادارة مع مواد الحاسب 

- مقدمة في الادارة الحديثة > المادة دسمه شويه ونظرية 

- مباديء التسويق > برضو نظريه بس ممتعة 

- مباديء نظم المعلومات > جميله ودي المادة لازم تفهميها قبل ماتحفظي 

- تنظيم وبنيان الحاسب > اصعب مادة مرت عليا يحتاج منك تركييييز ولازم تذاكريها أول بأول ولا بتضيعي 

- السلوك التنظيمي > مره مررره سهله كل كلامها عارفينو مثلا تتكلم عن الصراعات والضغوطات في العمل والقروبات 

-مباديء نظم التشغيل > حلوه بس صعبه تحتاج تركيز ومذاكره اول بأول 

- نظم ادارة قواعد البيانات > اكثر مادة حبيتها وكلها فهم يمكن فيها مصطلحات وتعاريف تنحفظ بس لازم تفهميها 

-هندسة البرمجيات > مره تحتاااج تركيييز ومذاكره اول بأول 

-مقدمة ادارة مشاريع النظم البرمجية > هذي الماده مو صعبه بس ممله شويه 

- مباديء شبكات البيانات > متوسطه يعني فيها السهل والصعب 

( هذي المواد الين المستوى السادس لاننا احنا دوبنا في السابع ممكن بعدين نعمل ابديت للموضوع ) 

+ ( نصيحة بما انك دخلتي حاسب بصفة عامة لازم تذاكري أول بأول ) 

المشاريع : 

بالنسبة للمشاريع احنا في فرع الفيصلية كان عندنا لكل مادة لازم مشروع وصراحة اكثر شيء ياخذ مننا جهد هيا المشاريع 

~ نصيحة اول ماتعرفي ايش هوا المشروع ابدئي فيه عشان ماتنضغطي في وقت التسليم 

صح كانت المشاريع صعبة في اغلب المواد بس تحسي بمتعة وتستفيدي اكثر ولمن تخلصيه تحسي بإنجااااز كبيير عملتيه 

المسمى الوظيفي لخريجة نظم معلومات : 

يعني ممكن تكوني محلله نظم ، مصممه نظم ، مطورة نظم ، 

مديرة نظم قواعد بيانات ، محلله نظم تجارة الكترونية . 

مجالات العمل فيه : 

مجالات العمل كثيييييررة وماتفرق كثير بين تخصصات الحاسب يعني اي مجال فيه IT تقدري تدخلي فيه

وزي ماانتو عارفين كيف دحين سار الحاسب مهم يعني مافي مكان مافييه قسم للاي تي 

وبس هذا تقريبا كل شيء في التخصص وأي شيء تبغو تعرفوه 

ومااتكلمنا عليه ممكن تسألونا